انا : سيادة الرئيس السابق ...ازيك؟
هو : نحمده على كل حال....انت مين؟
انا : انا المواطن السابق.
هو : بتشتغل ايه يا ابني؟
انا : انا بشتغل مستني.
هو : مستني ايه؟
انا : اخرتها.
هو : ولسه مزهقتش؟
انا :هو حضرتك تعبت؟
هو : لأ.
انا : ولا انا زهقت.
هو : يعني انت عاجبك الرئيس الحالي؟
انا : ايوه عاجبني ......انا بس مش عاجبني المواطن الحالي.
هو : وانت مالك بالمواطن الحالي؟ مش انت المواطن السابق؟
انا : فعلا.....بس احنا الاتنين تقدر تقول حاجه واحده.
هو : طيب ما هو انا كمان والرئيس الحالي تقدر تقول حاجه واحده.
انا : يا ريت حضرتك تجيب من الآخر.
هو : اللي تعرفه احسن من اللي متعرفهوش ...وانا تعرفني كويس.
و إدي العيش لخبازه ولو سرق نصه.......وانا الخباز.
و ايه اللي رماك عالمر ..... الامر منه.
و مسرها ترجع ريمه لعادتها القديمه.
انا : تمام....تمام....تمام.....انا دلوقتي بس اتأكدت
وعرفت منك انت عايز تبقى ايه اخرتها.........مع السلامه يا كبيرهم.
هو : استنى عندك رايح فين ؟ انا رئيس سابق و انت مواطن سابق....يعني يا نرجع سوى يا نضيع سوى ....مش كده ولا ايه؟
انا : ما هو اللي حضرتك متعرفهوش اني انا المواطن الحالي .....السابق سابقا.........لسه برضه شغال مستني .....يمكن تكون عيوبي هي هي ....بس بحاول اتغير.....وهتغير .....عارف ليه؟ لإني خلاص دفعت التمن.
هو : وايه يعني ما هو انا كمان ممكن اتغير .......واقدر كمان ادفع اي تمن
انا : اللي انا دفعته متقدرش انت تدفع زيه......انا دفعت التمن دم......دمي انا نفسي
هو : اهبل .....انت كده تموت!!
انا : ايه يعني؟؟؟ما هو انا كنت معاك ميت.
هو : لما جوعك يقرصك مسيرك تفوق.
انا : لو جوعي قرصني........كرامتي هتطبطب عليا
هو : طيب.....خلاص ...انتهت الزياره.
انا : عندك حق ....اتفضل سيادتك من غير مطرود
المقال ملكية فكرية لكاتبه فقط ، و لا يجوز نقله أو اقتباسه دون إذنه.
الآراء المنشورة بالمقال خاصة بكاتبها و ليس بالمدونة.
تم النشر بموافقة من كاتب المقال.
ليست هناك تعليقات:
إرسال تعليق